ໃນວັນທີ 12 ມິຖຸນາ 2026 ທີ່ນະຄອນຫຼວງວຽງຈັນ. ກົມຊົນລະປະທານ ກະຊວງກະສິກໍາ ແລະ ສິ່ງແວດລ້ອມ (ກສ), ໄດ້ຈັດກອງປະຊຸມຄະນະຊີ້ນໍາ ໂຄງການຄຸ້ມຄອງ ແລະ ຫຼຸດຜ່ອນໄພນໍ້າຖ້ວມ ແລະ ແຫ້ງແລ້ງ (ຄລຖລ) ຂັ້ນສູນກາງ ປະຈໍາປີ 2025 ແລະ ທິດທາງແຜນການ ປະຈໍາປີ 2026. ເຊີ່ງໂຄງການດັ່ງກ່າວແມ່ນໄດ້ຮັບທືນການກູ້ຢືມ+ຊ່ວຍເຫຼືອລ້າ ຈາກທະນາຄານພັດທະນາອາຊີ (ADB) ແລະ ທຶນສົມທົບຂອງລັດຖະບານ ສປປ ລາວ. ໃຫ້ກຽດເປັນປະທານຮ່ວມ ຂອງທ່ານ ປອ. ນາງ ຈັນທະຄອນ ບົວລະພັນ, ຮອງລັດຖະມົນຕີ ກະຊວງກະສິກໍາ ແລະ ສິ່ງແວດລ້ອມ ແລະ ທ່ານ ໝັ້ນຍືນ ຄິນສະໝອນ ຮອງປະທານຄະນະກຳມະການປົກຄອງແຂວງໆຄຳມ່ວນ, ມີທ່ານຫົວໜ້າກົມຊົນລະປະທ່ານ, ຄະນະຊີ້ນໍາໂຄງການຂັ້ນສູນກາງ ແລະ 3 ແຂວງເປົ້າໝາຍຄື: ແຂວງ ຄໍາມ່ວນ, ບໍລິຄຳໄຊ ແລະ ນະຄອນຫຼວງວຽງຈັນ ພ້ອມດ້ວຍແຂກທີ່ຖືກເຊີນເຂົ້າຮ່ວມ.

ໃນພິທີດັ່ງກ່າວທ່ານ ຮອງລັດຖະມົນຕິກະຊວງກະສິກຳ ແລະ ສິ່ງແວດລ້ອມກ່າວຈຸດປະສົງຂອງກອງປະຊຸມແມ່ນເພື່ອ:

1). ຮັບຟັງການລາຍງານໂດຍສັງເຂບ ຂອງຄະນະຮັບຜິດຊອບໂຄງການ ຂັ້ນສູນກາງກ່ຽວກັບຄວາມຄືບຫນ້າການຈັດຕັ້ງປະຕິບັດ, ສິ່ງທ້າທາຍ ແລະ ຂໍ້ສະເໜີ ເພື່ອປັບປຸງແກ້ໄຂໃນຕໍ່ໜ້າ ຂອງໂຄງການ ໂດຍຕິດພັນກັບບັນດາໜ້າວຽກ;

2). ທິດທາງແຜນການ ປະຈໍາປີ 2026 ແລະ ຍຸດທະສາດໂຄງການໃນຕໍ່ໜ້າ.

3). ຮັບຮອງເອົາເນື້ອໃນຜົນການຄົ້ນຄວ້າ, ການປຶກສາຫາລື ແລະ ການປະກອບຄໍາຄິດ ຄໍາເຫັນ ຕໍ່ບົດສະຫຼຸບຂອງໂຄງການ ໂດຍສະເພາະ ກ່ຽວກັບບັນຫາທີ່ພົບພໍ້, ສິ່ງທ້າທາຍໃນການຈັດຕັ້ງປະຕິບັດໃນໄລຍະຜ່ານມາ ແລະ ວິທີການແກ້ໄຂ ວ່າມີຄວາມສອດຄ່ອງຕາມສະພາບຄວາມເປັນຈິງ ຂອງແຕ່ລະທ້ອງຖິ່ນແລ້ວບໍ.

ໃນເວລາມາ ທ່ານ ປອ. ຄຳຮູ້ ພັນທະວົງ ຜູ້ປະສານງານໂຄງການ (ຄລຖລ) ຂັ້ນສູນກາງ ໄດ້ລາຍງານຄວາມຄືບໜ້າໃນການຈັດຕັ້ງປະຕິບັດໂຄງການໂດຍລວມ, ແລະ ຜົນໄດ້ຮັບຕົ້ນຕໍຂອງໂຄງການຄື: ເພື່ອແນ່ໃສ່ຫຼຸດຜ່ອນຄວາມສຽ່ງ ແລະ ການປັບຕົວຕໍ່ການປຽ່ນແປງດິນຟ້າອາກາດ ຄຽງຄູ່ກັບການປັບປຸງຊິວິດການເປັນຢູ່ຂອງຊຸມຊົນກະສິກຳໃນ 3 ແຂວງເປົ້າໝາຍຂອງໂຄງການ, ໂດຍການເພີ່ມທະວີການຄູ້ມຄອງນ້ຳຖ້ວມ ເສີມສ້າງຄວາມທົນທານຂອງໂຄງລ່າງພື້ນຖານ ຊົນລະປະທານ ຕໍ່ດິນຟ້າອາກາດ, ຫັນປຽ່ນການປູກພືດທີ່ມີມູນຄ່າສູງໃນລະດຸແລ້ງ.

ຈາກນັ້ນບັນດາຜູ້ແທນທີ່ເຂົ້າມາຮ່ວມໃນກອງປະຊຸມ ໄດ້ພ້ອມກັນປະກອບຄຳຄິດຄຳເຫັນ, ພິຈາລະນາຮັບຮອງເອົາເນື້ອໃນ ແລະ ປຶກສາຫາລືກັນຢ່າງກົງໄປກົງມາ. ໃນຕອນທ້າຍຂອງກອງປະຊຸມ, ທ່ານຄະນະປະທານ ຍັງໄດ້ຮຽກຮ້ອງໃຫ້ບັນດາແຂວງທີ່ນອນໃນເປົ້າໝາຍໂຄງການ ສືບຕໍ່ໃນການຮ່ວມມື, ການຄົ້ນຄວ້າ, ປະກອບຄໍາຄິດຄໍາເຫັນຕໍ່ທຸກບັນຫາ ຢ່າງພາວະວິໄສ, ເລິກເຊິ່ງ ແລະ ກົງໄປກົງມາ ເພື່ອເຮັດໃຫ້ເນື້ອໃນກອງປະຊຸມໃນຄັ້ງນີ້ ມີຄຸນນະພາບ, ສາມາດນໍາໄປຜັນຂະຫຍາຍ ແລະ ຈັດຕັ້ງປະຕິບັດຢ່າງເປັນຮູບປະທໍາ.

ພາບ ແລະ ຂໍ້ມູນເພີ່ມຕື່ມ